- 2017.05.15
炎炎夏日，有咩叹得过系屋企凉冷气？今期《选择》测试咗14款两匹的
分体式变频冷暖空调机。一齐睇睇！
今次14款样本，售价由六千几到万五蚊不等。所有样本都通过基本嘅安全检测，整体表现仲唔错添！除咗2款总评拿到4.5分，剩余各有6部，总评分别攞到4分同3.5分。
买冷气机，唔系够COOL就得。识得拣，梗系拣部能源效率高嘅㗎啦！
虽然今次全部样本，都攞到1级能源标签，但佢地嘅制冷效率同悭电程度，可以好唔同。
能效比，简称EER，系指喺特定温度同湿度下，部冷气机嘅制冷量与耗电量的比率。数值越高，代表部冷气机制冷效率越高。
记住，要根据空间嘅大细，嚟拣部适合的冷气机。例如你个厅明明比较大，但就买部制冷量唔够嘅变频式冷气机，以为可以悭电，其实仲晒电！
例如你想将室内嘅温度校到25度，但系部变频式冷气机制冷量又唔够，佢就会长期「开到行」，即系达到佢嘅最大负荷，先达到预设嘅温度，咁佢嘅制冷效率，即系能效比，会比较低。
相反，一部制冷量同空间配合的变频式冷气，就只系初初开机时先会最大负荷，过后长时间用低啲嘅转速运行，已经够维持预设温度，而低啲嘅转速嘅能效比会高好多，半负荷时嘅能效比，更加会提升3成至7成半不等！
所以大家要因应空间大细，拣部制冷量合适嘅变频冷气，吾驶成日要佢去到最大负荷，咁就自然悭电又环保啦
除咗能效比，制冷季节性表现系数可以更准确反映部冷气机嘅能源效率。
制冷季节性表现系数，代表冷气机全年由室内排走的总热量，同总耗电量的比率。测试发现，系数最高同最低的两款冷气，数值相差达到两成，即系耗电量亦相差两成！
唔少冷气机都有抽湿功能，用冷气机嚟抽湿，表现又得唔得呢？
测试发现，各样本在标准环境下的抽湿表现参差。表现最好嘅一款有四点评分，最差嘅只有两点评分。其实冷气机耗电量一般比较高，如果唔使调节室内温度，用抽湿机抽湿，会更加划算！
消委会提提你，部冷气机嘅性能固然重要，但安装同保养都唔可以忽略！
- 冷气机装得好唔好，会直接影响制冷性能。一定要搵合资格、经验丰富、负责任及信誉可靠的承办商嚟安装，由制造商或代理商负责安装更加好，一旦安装有问题，可以直接搵佢地跟进。
- 通常制造商或代理商嘅保用都只保证机件运作正常，唔负责因安装产生嘅问题，例如雪种喉管接驳唔好，出现嘅渗漏问题。所以过后发觉系安装做得唔好，就要搵番当初负责安装嘅承办商跟进啦！
总之，想拣够COOL，制冷效能又好嘅分体式冷气机可以点？
睇487期《选择》月刊啦！